*Hanni:* Ahh. Da feine Herr Sepp loust si a amoil blicka! Houst du überhapst amoil afd Uhr gschaud? Wir woan umara viere verobred und etza is hoiwe finfe. Glabst du ebba mir mocht des an Spaß olawail af di zum wortn?

*Sepp:* A Grias die Hanni! Mei des duad ma etzad so Leid! Woast, i wor scho aufm hoiwen Weg doher bis ma afgfoiln is das i den bleiden Ofn ho oloua! Dann howe hald umkean miassn. Und die hoiwe Stund dau, die kast ma doch amoi verzeiha, oda wos moinst du?

*Hanni:* Die hoiwe Stund? DIE HOIWE STUND? Du houst owa scho gmkert das wia as kibln schitt! Schau mi doch amoil o, pitschnos bin i! Und frian dud mi a wia an Hund. Und des scho a ganze HOIWE Stund lang. Und asadem konnst da die blede Asred sunst wo hi stecka! An Ofa oloua . . Wers glabt! Du duasd doch nia Kocha! Und asadem worn wir zum Essn verobred! Wie kummts dann dasd an Ofa oloua kast?

*Sepp:* Oiso Hanni, wos glabst den du vo mir? I wui di doch ned dablecka! I ho wirkli den sakrischen Ofa oloua! Und stell da vor, a Ofa is nird bloß zum Kocha do! I woit hold an Tee!

*Hanni:* Glam du i des zwoa imma nu nird owa naja. Woast du, des geht ma scho so langsam afd nerven wenn du olawail z’spout kummst! Woast, seid ma uns kenna kummst du permanent z’spoud! Do wird ma ja ganz dorert dabei!

*Sepp:* Oiso etza hear amoil af do! Permanent! I glab du spinnst aweng! Permanent. I glabs nird! I kumm nird permanent z’spout! I …

*Hanni (unterbricht):* A fralle duast du des! Wos wor na zum Beispül am Karsamsdog? Umara achte homma an Disch beim Nico bstellt ghabt! Und wen bist kumma? Gor nird! Nirdamoil agruafa houst! Ganz aloa bin i durtn gsessn und ho gwat wia a bleide!

*Sepp:* Do hammas ja! Wen bin i do z’spout kumma? Goa nird!

*Hanni:* Ja, aber kumma bist a nird! Des is ja nu schlimmer als wemma z’spoud kummt!

*Sepp:* Owa falls dus vergessn houst, wir ren grod vom z’spoud kumma und nird vom goa nird kumma! Do is vei a unterschied, gall!

*Hanni:* A geh, rutsch ma doch an Bugl owa! Eigentlich wollt i dir ned bes sa, dasd mi vorring aglong houst mit deim deppadn ofa, owa etzad bin i stock narrisch! (geht)

*Sepp:* Mei Hanni, wort doch! Duad ma leid! Zefix, i vergis hold ab und an wos I für a bleda Lackl bin! Und du houst Recht ghabt, I ho in Ofa nird oloua! I wor im Schmuckgschäft!

*Hanni:* Aha! Hob Is doch gwusst! Und warum houstas nird glei gsagt? Wos houstn überhapst im Schmuckgschäft wuin?

*Sepp:* Mei Hanni, i hätts eigentlich spada vorghabt, wemma im Restaurant gwen wan, oba etz muas i des glei macha bevorsd ma weggehst!
(geht auf die Knie): Hanni, I liab die mehr ois alles af da Welt! Du bisd sunna in meim Lem! Ohne di konn i nimma! Deshalb wui i di froung obst mei Frau wern wuist!

*Hanni:* (bricht in Tränen aus) Mei Sepp, fralle wui I! Mei, das i des nu erlem derf! Sepp? I liab di!

(Und so houd‘ Gschicht‘ a guads End gnumma! Moi schaua wia lang des nuraso bleibt! ;) )

• Einsendungen zum Mundart-Wettbewerb