*Rese:* Beppe, du hame, wo bleibstn du so lang, ha? Kannst ma des moi song?

*Beppe:* Geh, reg de net af rese. I hab no schnai a dragl Krachal hoin miasn, zwecks heid afd nocht oft.

*Rese:* Ja supa dass du owei a ausred host. Oa moi kannst oba scha kema, ohne dasse ewig af di woatn muas. Außadem schitts a na wia aus eimern und froisn duat me a wia d sau! Hedsd me o wenigstns aruafa kind. Zfai wad des iats a net verlangt gwen.

*Beppe:* Geh iats gibs a moi noch du oide zwidawuarzn. Owei nua bled dahea ren, mea kannst du a net. Du warst fai a scha oft gnua zsped. I bin net da oanzige dea net zua ausgmochtn zeid kimd.

*Rese:* -- niest --

*Beppe:* Haif da god.

*Rese:* Gaids da god. Oba des is dei schuid wenne iats krang wia. Oft griage en kathar und kann des wochnend net fuatgeh. Oft kannst oba du a dahoam bleim!

*Beppe:* Ha, des kannst da oba sauba oschminga! I bleib o net dahoam nua weilst da du eibaidsd dassd dahoam bleim muast!

*Rese:* Wennst agruafa hedsd hed ma des problem eh net. I hed sowieso na a boa loibe kafa miasn und dann hede net do in reng gwoat sondan war zum becka ume ganga. Des is ois dei schuid.

*Beppe:* Geh hea moi mid deim gspinnad af iats. Des bissei reng wiad da iats scha net so gschod hom und a handy habe a net dabei ghod. Geh iats geh ma hoam und dann ess ma an zwetschgndatsche fo meina mama. De hod ma heid extre na oan fia uns fobei brod.

*Rese:* Hea ma bloß af mid deim deppadn zwetschgndatsche! Du bist z sped und aus. Hedsd de wenigstns moi entschuldigen kind, oba na. Du net. Wei du bist da scheinbar z guad dafia.

*Beppe:* Weil des iats so schlimm is. I bin grod amoi a hoibade stund z sped. Und des bissei reng. Gibs hoid oamoi noch du elendiga grantscheam.

*Rese:* Und so resd du mid deina freindin? Na sauba soge. Du bist ja moi a guada freind.

*Beppe:* Mei rese. I mog de o eh so stoag, oba manchmoi kannst einfach dei grantln afhean. Wenn ma einfach ganga wadn wia i kema bin, wad ma scha lang dahoam und du hedsd a woame deck und kannst de foa en ofa sitzn.

*Rese:* Entschuldig de hoid einfach. Des is genau wia s letz moi. Wia ma do afd houzad fom Anal und fom Hias geh woidn. Do bist a z sped kema. Und entschuldigd host de damois a net.

*Beppe:* Oba do host du d schuid ghod und net i! Du host zu mia gsogt i muas na a boa hoibe alkoholfreis kafa wei dei voda moang fobei kimd und dea deaf koa normals dringa. Und du host gsogt wenne scha im gscheft bin, dann kanne glei na fo deina dande foabei foan und  a boa kletzn hoin.

*Rese:* Na guad, dann hoid do net. Oba des oane moi wia ma en kiata woidn! Do host me a ewig woatn lossn.

*Beppe:* Ja heagod namoi, do bine na beim Hias gwen und ha eam ghoifa wias en neia ofa eine da ham.

*Rese:* Dassd du a owei a ausred host. Scha langsam glangts ma iats wiagle mid dia. Is a einfache entschuldigung so schwar fia di?

*Beppe:* Ja und fia di? Es is o net aso dass i owei z sped kim. Wos isn mid dia, ha? Wos wa den letze woch wia ma ausgmocht ham du hoist me fom kiachawirt o? Wo warst denn do so lang? I ha me net beschwert!

*Rese:* Na tschuldigung, dasse des oame mizal, des da lausbua fom Meyer ens wossa einegwoafa hod, ausazong hab! Glaube scha dass dia recht war, dassd lenga beim wiat bleim kannst.

*Beppe:* Ja na guad, dann: Es duat ma leid rese, dasse iats scha zum wiederholten male z sped kema bin. --leise -- a wenne nix dafia kind hab…. -- laut -- Ois wieda guad?

*Rese:* Segst, war iats des so schwar? Guad geh ma.

zurück

• Der Mundart-Minidrama-Wettbewerb
  
• Einsendungen zum Mundart-Wettbewerb